Адказаць на каментар

28 верасня працягнецца судовы працэс над удзельнікам акцыі пратэсту супраць фальсіфікацыі прэзідэнцкіх выбараў, мінскім будаўніком, Святаславам Барановічам, правёўшым у СІЗА №1 на вул. Валадарскага два з паловай месяцы. 29 жніўня пад час разгляду справы ў судзе Маскоўскага раёна, суддзя Алена Рудніцкая змяніла меру стрымання на падпіску аб нявыездзе і перанесла разбіральніцтва на канец верасня. У залі суда з Барановіча былі зняты кайданкі.
 
"На мітынг я прыйшоў, каб падтрымаць свайго кандыдата, Андрэя Саннікава. Мітынг спачатку быў мірным і я нікога не збіраўся біць ці нешта такое. Але потым атрымаў дручком па галаве ад амапаўцаў і не стрымаўся, пачаў адказваць, біў па шчытах. Гэта зафіксавана на відэа, таму адмаўляць гэта мне не выпадае. Сядзеў на "Валадарцы", ставіліся там да мяне нармальна. І вязні, і ахоўнікі" – распавёў пасля вызвалення для “Радыё Свабода” Святаслаў Барановіч.


Барановіч – апошні затрыманы за ўдзел у паслявыбарчых акцыях пратэсту. Хлопца вылічылі праз відэаматэрыялы і арыштавалі праз 7 месяцаў па выбарах. Зараз падсудны ў сямейным коле чакае завяршэння сваёй “крымінальнай эпапеі” і адмаўляецца даваць якія-кольвег інтэрв’ю да абвяшчэння прысуда.