Адказ чыноўніка: Адзіночны пікет будзе замінаць выкананню правілаў дарожнага руху

Мінгарвыканкам працягвае прыдумваць адвольныя прычыны для таго каб забараняць адзіночныя пікеты ў падтрымку Украіны у межах кампаніі “Карусель пікетаў”.

Таццяна Грачанікава, якая падала заяўку на правядзенне пікета салідарнасці з Украінай, атрымала адказ з Мінгарвыканкама, падпісаны намеснікам старшыні па ідэалогіі, сумнавядомым ідэйным камуністам Ігарам Карпенкам.

Праводзіць пікет, як чакалася, забаранілі. Даволі цікавая фармулёўка прычыны забароны сведчаць пра тое, што у чыноўнікаў гарвыканкама даволі добрая фантазія.

У матывіровачнай частцы адказу напісана, што правядзенне адзіночнага пікета не будзе спрыяць захаванасці элементаў добраўпарадкавання і зялёных насаджэнняў, а таксама можа ствараць перашкоды пешаходнаму і транспартнаму руху ды адцягваць кіроўцаў транспартных сродкаў ад выканання правілаў дарожнага руху.

Далібог, было б больш шчыра і сумленна выступіць кіраўніцтву горада з заявай, што пікеты і масавыя акцыі ў Мінску забараняюцца як такія, ды не займацца імітацыяй прававой дзяржавы.